杜汶澤爆粗寸冇梳頭 林作還擊：你都講我，仲唔成功咩！
藝人杜汶澤日前在網上節目開Talk，以「靚仔靚女係咪大晒」為話題，期間真情流露粗口橫飛。講到「靚仔叫造型，醜男叫冇梳頭」時，更擺林作上枱：「林作咪叫做冇梳頭囉！成Ⅹ日個頭吹到咁Ⅹ亂，個頭九唔搭八，但佢又好想做明星。」得知林作是補習天王時，阿澤補充：「補習都OK，佢又識英文又識法律，又唔Ⅹ做律師，但個頭咁Ⅹ樣，佢諗佢自己做到明星，我成日都諗，佢點樣諗到出嚟嘅呢？」
「佢個樣都生得麻麻」
受到抨擊的林作不甘示弱發文還擊：「林作，根本唔係明星。係反明星，我完全只係做自己。個頭我冇Set過。個重點係我得到你嘅注意，澤哥都講我，咁我即使生成咁，仲唔係成功咩？之但係，澤哥雖然靚仔過我少少，都依然可以算生得麻麻。」其後記者聯絡上林作，他說：「我覺得大家都係諧星類，冇咩樣睇，其實佢一定明，都係為節目效果。佢一貫都係咁。」還笑言願意公開「挑機」，上杜汶澤的節目討論「何謂明星」、「何謂靚仔」，面對面鬥牙力！問到如何看待該節目，他說：「唔係香港主流明星可以做到，乜都鬧、乜都寸，係一個嘩眾取寵嘅節目，呢啲係節目嘅一種表現風格嚟。」
