姜濤獨吞百萬獎金食貴嘢唔使慳

姜濤成功奪冠後即關心如何攞獎金，難怪被監製狂窒。

前晚姜濤以大熱姿態成為ViuTV真人騷《全民造星》冠軍，受訪時坦言沒有想過勝出，問到如何運用獨得的百萬獎金時，自認「慳仔」的他說：「首先會去食好嘢先，因為我之前都好慳家，貴嘢都會諗吓，但依家就唔會諗。（貢獻畀父母？）一定會，同埋會請晒幫過我嘅人食飯。」又指獲得廣告合約比奪冠更為驚訝，暫未知會否入組拍劇，亦認同導演劉偉強之說，就算拍戲都不宜擔正做主角：「做配角可以畀你觀察到好多人。」

「遲到王」貪靚買鏡

有主持代網民問是否會用獎金買更多鏡，貪靚的他笑言：「都會買，我都知成日照鏡係缺點，會阻住人，我要多啲相信自己個樣。」導師郭偉亮問到是否將收到100萬元支票，姜濤即時向節目監製花姐查詢：「我都想知。」卻遭對方狂窒：「會暢晒一毫子嚟掟你！」另一導師Felix則叮囑他：「首要準時。」大爆他是「遲到王」。

亞軍Ian及季軍Lokman大爆獎項是臨時加設。	肥仔對於去向大賣關子。	任評判的周慧敏與導演劉偉強指三甲都是心水人選。

Lokman睇中Ian屁股

而亞軍Ian及季軍Lokman受訪時，直認獎項是臨時「加設」，Lokman說：「我哋算係有要求過，係好後期先知。」Ian就認為「加獎」是好事。Lokman又讚Ian唱歌時很性感，更HeHe味濃說：「好想打佢Pat Pat。」得第四名的肥仔被問到可會在娛樂圈發展，即胸有成竹大賣關子：「大家遲啲有機會知。」