去年傳出荷里活男神基斯伊雲斯（Chris Evans）完成明年初上映的漫威超英大作《復仇者聯盟4》（Avengers 4）後，就會正式告別「美國隊長」一角，日前他終於宣布「掛盾」，唔再做阿Cap！
日前完成《復4》補拍工作的基斯於社交網留言，感慨地說：「《復仇者4》正式煞科，至少可以講呢個係情緒激動嘅日子。好榮幸過去8年扮演呢個角色，對所有鏡頭前後嘅人同所有觀眾，多謝你哋畀我嘅美好回憶，永遠感激！」似暗示唔再演美國隊長。雖然粉絲老早做好心理準備，但仍在社交網流露不捨之情，發起「#ThankYouChrisEvans」。
有粉絲留言：「我係一個有成長問題嘅成年人，但我喊係因為對我嚟講，基斯伊雲斯演美國隊長意義重大。佢係永遠阿Cap。多謝你。」亦有粉絲向基斯留言：「你令我哋好愛Steve Rogers（美國隊長原名），讓佢離開係我哋最唔想做嘅事。你全心全意地演呢個角色，感謝你。你將永遠係我哋嘅美國隊長。」有粉絲估計角色會於電影中喪生！連「死侍」賴恩雷諾士（Ryan Reynolds）亦抽水回應：「我沒有大喊，我在默默流淚。」
而基斯不再演阿Cap亦不愁冇嘢撈！據知他已接拍新片《Knives Out》，同片有「007占士邦」丹尼爾格力（Daniel Craig）。其實除了美國隊長之外，他早於2005年已參演超英片《神奇4俠》（Fantastic Four）飾演「霹靂火」。而他從《美國隊長：復仇者先鋒》（Captain America: The First Avenger）飾演阿Cap開始，便拍足三集未曾被換角，角色更「活躍」於《復仇者》系列及其餘幾部超英片中。