天際翱翔 落地想嘔 蕭正楠暈足半日輸畀姚子羚
姚子羚與蕭正楠挑戰滑翔傘，二人在上空轉到暈陀陀，曹永廉還大爆阿蕭水皮過子羚，暈足半日兼幾乎嘔。阿蕭笑言：「因為唔習慣坐男人大髀，下次搵個女導師會好啲囉！」
姚子羚、胡定欣、曹永廉及蕭正楠正身在瑞士拍攝旅遊特輯，昨日去玩滑翔傘，由於現場有兩個導師，故只得姚子羚及阿蕭參與，於新西蘭玩過跳降傘的子羚說：「定欣、阿廉怕高，所以得我同阿蕭玩，其實感覺好正，不過上到高空就好凍，好似玩過山車咁，不停將我哋轉左轉右，好暈！我哋喺上空都要15分鐘，要自己喺個山度跑住出去，幾刺激！（有冇挑戰笨豬跳？）笨豬跳要自己跳落去，真係未有呢個衝動。」
唔慣坐男人大髀
阿蕭試過滑翔傘後，坦言好好玩，笑言自己像一隻雀：「梗係好玩，好刺激，尤其係起跑嗰一下，不過我就唔係好慣坐男人大髀，下次搵個女人導師會好啲囉！我落地後好暈，係咁失控打圈，離心力好大。（阿廉話你想嘔！）其實本來我冇事，企落嚟之後見到佢我就好想嘔。」
阿廉驚變「掛屍」
沒有玩的阿廉就笑言：「我原本同定欣都諗住玩，不過好彩冇，聽佢哋講喺上空不停打轉，阿蕭都頂唔住，佢都話暈想嘔，如果我喺上面，就係吊住條屍咁，一定死得，我畏高o架！好在冇玩，不過子羚好快冇嘢，阿蕭暈咗半日度啦！面青青好似就嚟『去』咁。」
曾應承黃翠如要好好照顧阿蕭的他說：「我應承過嘅！有乜嘢事我都會運番佢返嚟。」子羚則大讚阿廉身手靈活，前一日玩爬繩索時，他身手最好、最叻。