英國女歌手Lily Allen近期推出自傳，震撼故事浪接浪，繼爆出曾與已婚歌手撻着及遭唱片公司高層性侵後，近日再爆出14歲時曾被老竇Keith的朋友帶去酒店發生關係！
Lily於自傳中自爆14歲時去睇老竇Keith的友人踢波，賽後她發現對方遺下裝備在父親車上，她親身到對方下榻的酒店交還，二人相約於酒吧見面，對方請她飲了幾杯酒，最後帶她上房發生性行為：「我14歲、而佢19歲，不過對我嚟講佢好似另一世代嘅人。」她表示事後感覺有趣，但明白整件事並不對，後來更發現老竇以此事講笑，令她大感受辱！
她表示曾聽到老竇與友人計劃敲詐該波友：「佢哋仲制訂咗唔同嘅計劃去敲詐個男人，排練埋點打電話畀佢……我只係知道，老竇將我同個唔多認識嘅男人發生關係一事，變成同朋友間嘅笑話，令我感覺好唔舒服。」而她又於書中自爆，其實與19歲男子搞上前，未成年的她早於去巴西度假期間，失身於一名叫Fernando的20歲男子。
另外，Lily日前於訪問中表示老竇對其自傳內容有意見，但並非「爆房當笑話」一事，而是不滿書中寫道他帶13歲的女兒到Glastonbury音樂節期間，一度因毒品而引致心臟病發。她指老竇近日傳短訊澄清當年是食物中毒，她即道歉，但句句頂到行：「我話，如果我搞錯，真係好對唔住，不過我記憶就係咁，而你之前都冇解釋過！」父女關係似乎麻麻。
此外，書中亦爆出她曾與已婚歌手Liam Gallagher發展婚外情。日前她出席頒獎禮時，便公然與Liam哥哥Noel搭晒膊頭留影，未知是否又有新火花？