丁可欣歌聲醫心病追夢做自己
丁可欣這個名字，隨着「火雞姐」的身份在網上爆紅而為人認識。去年以歌手身份闖樂壇的她眼見香港人「生病」，希望可藉着歌聲傳遞正能量，治療心靈：「我想開解佢哋！」
把「火雞姐」網上我行我素那套照搬到音樂上，是歌手丁可欣（Yanki）的作風，繼去年的《撫心自問》後，籌備了半年的歌曲《So What?》似乎更能代表她，就像是一首自我介紹的歌。她回想自己亦曾經迷失、曾經硬要與別人比較致自信盡失、曾經麻木跟從社會既定標準，結果成為一個失去靈魂的人，承受的壓力超乎想像。
直至做了「火雞姐」，Yanki才開始認識自己，學識欣賞和相信自己，並找到自我價值，用自己的經歷，同時透過歌聲說教：「我想話畀人聽，每個人都有獨特嘅地方，靚同唔靚，定義好模糊，有自信就最好，贏昨日嘅自己就足夠，呢一、兩年好多朋友同我分享唔開心嘅事，但我發覺佢哋嘅唔開心係在於忘記欣賞自己，對自己冇信心。好多人問我點解可以唔理人點睇，照拍片？畀人鬧都唔驚，咁我行我素？我發覺好多人都有心病，可能壓力好大，但係十幾廿歲，點解咁大壓力呢？原來香港人生病，無形壓力令人生病，我想開解佢哋。」
為怕醜「舞男」壯膽
Yanki希望用歌聲治療心病，先從親友及粉絲入手，他們統統感受到歌聲背後有股正能量，即使未能解決心煩的事情，但起碼覺得開心，恍如變身音樂治療師的她說：「我真係估唔到做到呢樣嘢，覺得好開心，佢哋話睇住我成長，睇住我由舞蹈員變網紅，再變成歌手，見住我成長，令佢哋有勇氣去嘗試接受自己，接納自己，去搵番自己嘅長處。最近好多人同我講，佢哋依家好想去做番放棄咗好耐嘅興趣。我希望透過音樂改變我想改變嘅一啲問題，希望大家愛惜自己，欣賞自己，所以做咗呢隻音樂，傳遞正確嘅價值觀。」並分享一個成功個案，一位認識多年、熱愛舞蹈的男生一直很喜歡跳JazzFunk，卻不敢在人前跳，擔心被取笑是跳女仔舞的乸型，Yanki一直對他加以鼓勵，他最近終於鼓起勇氣，甚至自拍跳舞短片及上載到互聯網。
挑戰難度 儲錢出走
Yanki鼓勵大家做自己，但認為不應以此作為盾牌，寄語人人都應該受到尊重：「做自己都要尊重人哋，喺唔傷害人嘅情況下做自己係好嘅，唔可以話『我係咁(口架)啦，直腸直肚！』希望今次透過隻歌，大家用Good Way去做自己。」
問到現時做歌手踏出夢想第一步，下個目標是甚麼？她說：「自己係跳舞出身，其實好想有一隻跳舞嘅歌，但唔容易，唱歌都未做到好好，又要去跳舞，邊唱邊跳其實係好難嘅事。我要先畀自己一個心態，就係跳舞唔應該容易，根本係難！」她曾到日本、韓國和紐約學舞，坦言儲夠旅費就會再出發，向着做跳舞歌的方向進發。
免費做騷都制！「火雞姐」失蹤？
提到10月將再與歌手狄以達合作，演出「HiHi大爆炸」舞台劇，內容諷刺香港壓力大，Yanki笑言演出宗旨與「火雞姐」相似，享受演出的她說：「呢個Project唔係為咗賺錢嘅，資金唔多，我同阿達講可以唔使畀錢我，我唔收錢都得，唔會介意。依家我收四位數，淨係想有舞台畀我發揮吓，想講嘢，幫人減吓壓。」
同時宣傳新歌及準備舞台劇綵排，豈不是沒時間拍短片？難怪最近網上未見其蹤影！Yanki即時一人分飾兩角，搞笑地說：「『火雞姐』呢排玩情緒，得閒就拍，唔得閒就唔拍。最近我同佢鬧咗交，因為我喺《So What?》隻歌裏面扮佢，佢好唔鍾意，我哋吵咗鑊甘，佢仲上網拍片鬧我！我都忍佢o架啦，所以最近同佢冇乜傾偈！」說到正經話，她表示對短片要求高，寧缺勿濫，不想Hea拍才較少露面！
服裝：Second Kill HK、UpStairsApparel、TP Modern Lady