菊梓喬最愛中秋：其他節日係假
歌手菊梓喬昨日出席活動時，與粉絲一齊做玻璃燈籠，她坦言最愛中秋節：「我覺得其他嗰啲節日都係假嘅，得中秋節係真，係我好幼稚嘅諗法，因為中秋節個月亮真係好大好近，係上天畀我哋好美麗嘅節日，好浪漫。」她又稱中秋節不用工作，會與同事食飯：「嗰日我未必同家人慶祝，大家得閒先食。（會同阿妹同阿媽食飯？）係呀，但佢哋要返工，所以要夾時間。」
問到有可試過與男友共度難忘中秋？她笑言：「唔係呢啲，記得有年病咗，瞓喺張床度望住個月亮。（好慘喎！）係呀，嗰個係我最深刻嘅。同埋細個會同屋企人去樓下玩蠟燭、螢光棒。」她又稱最近推出《再創世紀》的片尾曲《只想與你再一起》，亦有煲劇：「都希望可以好似劇中演員咁擁有自己嘅烏托邦，覺得年輕人要有目標，鼓勵到我哋前進。（事業呢？）依家事業好緊要，係我嘅一切，事業唔只工作，朋友、粉絲都係我嘅家人同一切。」