林敏驄鬧市扮雞搵食艱難

藝人林敏驄昨日現身銅鑼灣街頭宣傳WeWa信用卡，身穿金雞服裝與市民一齊玩遊戲，笑言搵食艱難：「未試過扮雞，仲要眾目睽睽下，都有啲興奮，幾好玩。」月底他將開拍賀歲片，身兼演員、編劇、監製及導演四職，其餘演員有張繼聰、林盛斌、Shine、吳耀漢，他說：「我之前見到曾志偉，佢話我又拍賀歲片打佢，我話你成日都畀人打，冇乜所謂啦！（擔心票房？）全部都唔係我對手，我對手喺自己度。哈哈！」因演員高質素，全部影帝級，話頭醒尾，他完全冇壓力，又指電影一定笑到碌地，又有感動位，導演郭子健曾睇過劇本，大讚完整不用修改。