伊健2億新戲超支 志偉撲水埋尾

藝人鄭伊健、陳小春、錢嘉樂、謝天華及林曉峰主演新片《黃金兄弟》前晚在沙田舉行首映禮，監製及有份演出的曾志偉、錢嘉樂太太湯盈盈、林曉峰太太康子妮及兩名兒子都有到場。五子坐名車型爆出場，當年與他們合作《古惑仔》的吳鎮宇亦有到場與五子合照。

電影優先場反應不俗，問到會否拍續集？嘉樂直言想，因幾兄弟拍攝11個月非常享受，但要視乎能否回本，因拍攝一直超支，最終超支幾千萬：「係志偉一直畀聖旨執行監製，話點都要盡量滿足我，唔知係咪我前世借咗好多錢畀佢。」問下次會否叫埋老婆仔女參演？他表示最難過小春一關，因對方很反對兒子入行，小春說：「都係讀書先啦！」

「好似寵壞咗個仔」

對於嘉樂感謝超支仍繼續支持，志偉說：「因為洗濕咗個頭，最重要係成績好吖！拍咗二億幾，我自己都冇試過拍咁貴，好似寵壞咗個仔咁，啲老闆問我做咩唔同嘉樂上契，我話其實合理嘅，佢拍得好有心機，兩年推晒啲戲，因為佢知道同兄弟拍，一定要拍好佢。」講到好友兼冤家陳百祥（阿叻）表示冇收到出席首映的邀請，志偉說：「有搵製片親自打電話畀佢，佢份人唔得閒就話人冇邀請！佢仲話我橫店投資酒店市值十幾億，呢啲同佢畀Tips一樣，唔可信。」

鎮宇與五子合照以行動支持。	嘉樂（左）感謝志偉「打救」。	林曉峰的太太康子妮及兩名兒子、嘉樂的太太湯盈盈都有撐場！

天華報喜湊「好」字

嘉樂表示之前到台灣宣傳，當地觀眾很接受廣東話版本：「當晚我哋喺酒店傾到半夜四點，畀人投訴我哋嘈。（傾啲咩？）唔好驕傲，要保持初心，同埋第二集唔好收咁貴，係講畀天華聽嘅。」問到天華是否收最貴？他笑說：「我對白最少，除番開所以貴。」問到是否要努力賺奶粉錢？他隨即笑住宣布太太懷有第二胎，兄弟們一片哄動，天華說：「係喜上加喜，係有第二個，可以公布得，係粉紅色嘅！湊到個『好』字！」伊健表示到北京出席見面會，當地有廣東話及普通話兩個版本，但大部分人都支持廣東話版，因原汁原味。