李冰冰劃清界線：我只做合法事

捲入逃稅風波的內地女星范冰冰至今「隱形」達三個月，內地有關當局對於演藝人員的天價片酬及「陰陽合同」等問題極度重視及嚴肅處理，高收入的一線藝人受關注外，內地女星袁立一向力挺引爆逃稅風波的崔永元，早前更在微博意有所指的留言：「兩根冰棒的帳，都是一樣的！看誰命大！逃過一劫！」李冰冰昨日來港出席活動時，首次就有關風波發言。

身為國際頂級製錶品牌寶齊萊全球形象代言人的李冰冰，昨日和寶齊萊全球行政總裁Sascha Moeri、太子珠寶鐘錶集團主席鄧鉅明及副主席鄧宣宏雁，為品牌的銅鑼灣專門店擔任開幕剪綵嘉賓，現場更有醒獅表演，氣氛熱鬧。一身低胸裙現身的李冰冰，神采飛揚，狀態甚佳，皆因她和荷里活男星積遜史特咸（Jason Statham）合演的中美合拍片《極悍巨鯊》票房全球大收，外間指她在荷里活影圈的地位超然！

唔收錢拍港產片

《極》片在內地票房衝破10億人民幣（約11.4億港元），全球票房達5億美元（近40億港元），成績驕人，問到冰冰是否成為票房女王？她喜上眉梢說：「係呀，依家票房第一，全球收咗5億美元，我覺得好驕傲，接咗呢部戲我覺得好爭氣，冇諗過有咁高票房。導演對我好好，當我好似佢個女咁，如果我做得好，佢會成日抱抱或錫我，你哋都知呢啲老外禮貌式。（拍續集？）應該會有，未收劇本，其實做過一次已經好值得，雖然拍得辛苦，我又唔熟水性，潛落六、七米，又要有動作。」

問到票房佳會否加片酬？她笑說：「你哋（記者）話事啦！（加人工都正常！）係o架！值得嘅！」不過當問到收入不少，會否擔心稅局追稅時，冰冰立刻一臉認真的說：「我們都是合法的做自己的事情。」當再問到有否留意范冰冰逃稅風波的消息時，她立刻封嘴並示意身旁的助手解圍，其助手說：「唔好意思，我哋唔回應。」之後冰冰續稱期待和香港的導演合作，問會否減薪收平一點？她豪氣說：「唔收錢，劇本好嘅唔收錢！」

獲老外特別照顧

在《極》中全程零配音、親自以全英語對白上陣，問她是否有語言天分？她說：「我想大家見證一下，見證我呢個唔識講英文嘅人，慢慢學到識。（有語言天分？）可能係啦！好多人都係咁講，話我有天分，同埋我都好鍾意學習語言，平時都好鍾意聽廣東歌，同埋都鍾意廣東話，但冇時間學其他語言，好難。（每日花兩、三小時學英文？）拍戲時，由朝到晚個腦都係英文，因為細個冇呢個學習嘅背景，依家學就要用雙倍時間，一點一點咁去學。拍戲時全日學，平時難啲有時間學。」

冰冰更盛讚男角Jason十分好人零架子：「最記得有次佢主動走嚟話同我練習一次，我之後再問佢可唔可以練多幾次，佢話冇問題。佢仲話：『如果叫我學中文拍一套戲，我一定做唔到。』所以佢好理解，我要用另一種語言去拍戲。」