請舊愛睇騷？ 狄以達：緣分到自然會到

藝人狄以達、丁可欣（火雞姐）、鄧智堅及伍熹賢昨日穿上袈裟，為10月初舉行的一連五場舞台喜劇造勢，他們表示劇目去年演出後大獲好評，故今年「添食」，而兩次公演都有份投資的狄以達大叫緊張，又指對票房有期望，所以感到壓力：「上年成績打和，所以今次都好有信心，希望Keep到每年開騷。」問他會否邀請舊愛、出爐港姐冠軍陳曉華睇騷？他尷尬笑用「佛系」搞Gag：「緣分到佢就自然會到。（恭喜咗佢攞冠軍未？）冇正式，都係佛系多啲，見到就見啦！」講回舞台劇，他透露會加入新議題：「好似買唔到樓、結唔到婚、兩性關係、西洋菜街殺街等，成個劇都係充滿住我嘅矛盾同難處。」