26年歷史《都市閒情》停播 彭慧中宋芝齡有得留低
無綫長壽婦女節目《都巿閒情》即將停播，變奏為廣告雜誌形式新節目，主攻時尚的OL及年輕一族家庭少婦。據知主持彭慧中、宋芝齡及姚嘉妮等原班人馬繼續有工開。
《都巿閒情》已有26年歷史，無綫銳意進行改革，據悉新節目名為《都巿流行》，原有節目主持如宋芝齡、林淑敏、彭慧中、安德尊、姚嘉妮等都會繼續留守，進行改革的主要目的是配合潮流，因該播放時段吸引很多OL、年輕一族收睇，不似以往以家庭主婦觀眾為主，所以內容會變得年輕化。雖盛傳新節目會變成購物平台，但據知因受通訊事務管理局守則限制，只會主力為big big shop的產品作示範渠道。
余詠珊：內容未定
無綫助理總經理（非戲劇製作）余詠珊坦承節目將會進行改革：「做咗咁多年都想有啲變化，因為嗰個時段係黃金時間，有好多OL會睇婦女節目，所以想將節目做得生活化啲，內容以化妝、美容、營養煮食為主，但依家仲諗緊、度緊，點樣改革都未定實。」
節目深入民心
不過，一班主持異口同聲表示未收到改革消息，彭慧中說：「我都係等通知咋，希望繼續有工開。（節目做咗廿幾年係咪好可惜？）節目真係好深入民心，但如果公司真係有新嘅安排，都係為節目做到最好。」姚嘉妮亦表示未知情況：「冇收到消息我會冇得做！我諗公司都會好快通知我哋！希望一直支持《都巿閒情》嘅觀眾繼續支持我哋啦！」宋芝齡坦言睇到報道才知節目將會停播，暫未知公司的方向，她仍然照舊負責一星期兩日的主持工作，如常拍攝。