Rosemary佗B教瑜伽老公變天「哦」
即將分娩的名模Rosemary早前仍堅持佗住BB教瑜伽，每朝都被老公提醒身懷兩條人命，要事事小心！熱愛工作的她已接下廣告拍攝，預告產後一個月便要收身成功趕復工。
醉心瑜伽的Rosemary雖腹大便便，但仍堅持每日做一小時瑜伽及授課，早前還着高踭鞋行騷，坦言令老公擔心不已：「佢每朝都會同我講：『你可以教瑜伽，做你鍾意做嘅事，但要記住你依家唔係一個人，係兩個人！』佢仲好多意見，又會睇住我食乜。我以前食素，但醫生叫我要食少少肉，唔知係咪懷孕後口味唔同咗，鍾意咗食肉、意粉、Pizza同甜品，有段時間仲一日飲一杯珍珠奶茶！我都冇特別戒口，但要控制糖分。」
講到臨盆在即，Rosemary坦言跟老公懷着開心又期待的心情，並已執好「走佬袋」，奶奶亦專誠來港照顧她，並已聘請陪月員幫手。她又指產後會繼續工作，並已接下廣告，但要在產後一個月拍攝，故分娩前已要努力收身。
繼承做Model？唔想畀壓力
Rosemary談到對小朋友的期望，表示無論對方做甚麼都會支持：「我唔會對小朋友好大期望，否則好易失望，最重要係佢健康同保持好奇心，以及開放嘅思想。（想佢同你一樣做模特兒？）唔會畀壓力佢。」又指老公已有長遠計劃，將來有機會為小朋友而全家搬離香港。
場地：Pure Yoga
服裝：Pure Apparel
飲品：nood food