Aka婚紗有着落獨欠男主角

單身的Aka希望將來親自設計婚紗。

早前Aka（趙慧珊）首次擔任婚紗騷模特兒，同場還有靚媽咪藝人孫慧雪（雪雪），Aka表示雪雪在後台分享當年結婚的開心回憶，但仍然打動不到她，甚至她連拍拖也不想，Aka說：「雪雪話結婚嗰日好開心，我有幻想到，我相信將來結婚嗰日會好開心，但自己呢幾年唔想拍拖，一來係事業，二來好習慣一個人，做完嘢好攰，想返屋企食吓嘢、上網，因為連陪媽咪嘅時間都冇，好想過埋呢幾年先有心情拍拖，身邊朋友都話擔心我，唔知嫁唔嫁得出。」

結婚有贊助

自言極鍾意着婚紗的Aka，認為婚紗有神奇功效，即使狀態欠佳，穿上後也會加分。雖然冇結婚憧憬，不過完騷後婚紗設計師已答應贊助Aka將來的嫁衣：「我最想將來設計自己婚紗，鍾意魚尾vintage設計，少少樽領同長袖，最好大露背，仲諗住短頭髮唔留長，我已經有結婚班底，因為設計師話贊助我，化妝整頭都有埋，不過我話要等好耐，可惜係未有男主角。」

孫慧雪向Aka分享結婚的開心回憶。

Aka處女婚紗騷，獲設計師答應贊助嫁衣。