劉穎鏇中美男計展鵬呃食蟲

前晚Tiffany以休閒Look出席運動服裝品牌活動，講到最近經常出埠拍攝，她表示可以去好多地方，又指每次拍旅遊節目都會到當地最有特色的地方參觀，大開眼界。問可接受品嘗「特別」食物，例如昆蟲？她即大爆之前拍攝《搭上高鐵愛旅遊》時，被陳展鵬及何廣沛呃食蟲啫喱：「食咗落去即刻想嘔番出嚟！佢哋之後同我講，驚咗，食落真係以為係啫喱，原來裏面包住隻蟲！有其他重口味嘅嘢去遮蓋嗰種味，我本身好怕蟲，要我食埋就真係唔得，見到都會嗌住走，之後做咩都要問清楚。」

玩過山車細膽咗

Tiffany又笑言公司派給她的工作都是挑戰其底線，簡直鑊鑊甘：「啲人成日話我畏高，但我係怕離心力，由細到大都唔敢玩過山車，但最近嘅《學是學非》、《搭》已經過晒我嘅底線，大家以為過咗《學》喺韓國玩機動遊戲嗰集我會變大膽，但其實係更加驚，因為已經知道嗰種感覺。」

怕醜唔敢水着

問到是否寧願於鏡頭前性感着泳衣，亦不想挑戰離心力？Tiffany即怕醜大叫揀唔落手：「當年選港姐着泳衣都唔係咁舒服，始終自己係保守啲，除咗去沙灘、游水另計，平時出街都盡量避忌，所以呢個真係好難揀！」