劉志華遇蛇愛貓9秒9救駕
香港時裝設計師劉志華（Henry）帶同愛貓「Jaguar」亮相東網巨星節目《巨星Pet Pet》，為了牠，家中長播古典音樂及種滿水種植物，原因是牠乃救命恩人！
十年前，劉志華在屋苑經常見到Jaguar出現，認定是可憐流浪貓，直至天氣寒冷，見Jaguar蹲在門前，不忍心而放牠入屋，當作是自來貓，事隔不久真正主人登門尋貓：「原來Jaguar係樓上養，佢係一個女機師，因為成日飛，所以開住個窗等Jaguar可以走嚟走去，佢話如果隻貓咁鍾意你屋企，就畀你養啦。」
立功升呢 入房上床
劉志華表示因為牠初時身材纖瘦似隻豹，所以改名做「Jaguar」，但現在已變成加菲貓：「我原本養咗兩隻貓，Jaguar初到時好清楚自己嘅地位，唔會上樓、唔敢入房，直至佢救我一命之後，佢就好識性咁知道自己身份地位唔同咗，要入房兼上床。」
有片為證，當年劉志華在花園遇到一條蛇，大嗌救命，樓上的Jaguar第一時間趕到：「Jaguar 9秒9衝咗出去花園救我，佢同嗰條蛇不停喺度玩，條蛇入咗個叢林，佢又追住條蛇，逼條蛇入坑渠，佢先安樂。」護主有功，劉志華自此錫到燶，上班前會播古典音樂讓Jaguar安睡，Jaguar要飲水種植物的水，因而屋內有不少水種植物。
Profile
Jaguar
年齡：不詳
性別：雄性
品種：美國短毛貓
飼養年期：10年
特性：愛聽古典音樂
性格：善解人意
《巨星Pet Pet》繼傅穎、李旻芳及羅敏莊母女等十多位紅星帶同各式各樣寵物亮相後，其他陸續登場，大家可透過東網App及東網網頁隨時隨地收看及重溫。
https://bit.ly/2KQG3ai