英國萬人迷碧咸（David Beckham）老婆Victoria出名係「虎媽」，為捧四子女成材不遺餘力。最近她聘請熱愛攝影的大仔布魯克林（Brooklyn）做其時裝品牌的御用攝影師，被外界批評唔夠班！
數星期前，Victoria的時裝王國Victoria Beckham Ltd因去年虧蝕，重整架構後裁走60名員工，近日被爆請19歲大仔布魯克林為她打工。由於在紐約設計學院讀攝影未夠一年的布魯克林上月「輟學」，今次孭重飛為母親與大型運動品牌合作的廣告任攝影師，不少網民質疑他是否「夠班」！
有知情者說：「布魯克林接呢個新廣告拍攝，令行內人好驚訝，因為佢太後生同經驗非常不足，但Victoria一意孤行，因為呢個係阿仔好寶貴嘅經驗，同埋可以母子檔一齊工作亦係佢嘅夢想。佢相信阿仔對眼，亦鍾意佢夠後生。」
早於2016年，布魯克林獲英國經典品牌邀請擔任Instagram廣告專屬攝影師後亦惹爭議，當時有網民認為品牌只是睇中碧咸家族的名聲。去年他推出首本攝影集《As I See It》，亦被踩拍得好差，皇家攝影師Arthur Edwards狠批書中冇一張相Sharp外，更指他連基本技巧都唔識，最終攝影集銷情慘淡。
其實Victoria用自己名氣來捧子女早有前科！她經常在社交網上載三子告斯（Cruz）及細女夏柏舒芬（Harper Seven）唱歌玩音樂、畫畫等照片，大晒子女才華！最誇張是兩個月前，她為催谷二仔羅密歐（Romeo）變「網球界碧咸」，向有關當局申請於牛津郡大宅，花約31.2萬港元建人造草坪，讓二仔放暑假時「操波」。去年又被爆花12多萬港元，「打尖」幫羅密歐入英國非常著名的Queen's Club打網球。