楊穎妍全天候接Job追求者絕迹
前組合Magic Gals成員楊穎妍（Icy）擔任靈異節目主持而為人認識，原來除了幕前工作外，女強人Icy一直獨自經營模特兒公司，又兼任寵物保母。她自認男仔頭，大呻嚇怕追求者！
女強人Icy獨自打理業務已六年：「隨住年齡增長，想多啲人認識唔同嘅我，唔係淨係識做主持同唱歌，而係裏面嘅嘢。」她表示平日忙於為客戶物色模特兒、演員，甚至動物演員：「我之前借過自己隻貓畀人拍戲，期間走失咗半個鐘，好驚！有諗過唔再帶佢哋做嘢。」
男仔頭愛鐵騎
愛心爆棚的Icy亦有做外國流行的寵物保母，實行多方面發展，稱得上女強人，她說：「一日24小時真係唔夠，所以每月都會去旅行獎勵自己，不過話就話旅行，其實電話都係24小時On call接Job。」
個性硬朗的Icy表示從小已愛上電單車，外國回流返港後，考獲電單車牌：「我好似爸爸，佢好鍾意揸電單車，數學亦好叻，而我大學就主修數學，仲有學手語、打鼓及射箭，全部都係爸爸鍾意嘅嘢。」又自言性格男仔頭，嚇怕不少追求者：「通常女仔都怕曬，但係全部戶外活動我都會參與，可能性格太唔女仔，冇乜人追。」不過她深信緣分，終有日會遇上知音人。
Profile
三圍：35D、24、36
演出作品：電影《賭城風雲》、《喜愛夜蒲3》、《激戰》、《鴨王》等；電視劇《VR驅魔人》、《再創世紀》