李佳芯（抓）廣告賺定奶粉錢

熱播劇《BB來了》昨晚於無綫電視城中菜廳舉行祝捷晚宴，一班主角李佳芯、高海寧、黃致豪、徐榮、楊卓娜以及高層杜之克、曾勵珍等出席，該劇首兩周7天跨平台平均總收視達29點，創2018年劇集首兩周收視之冠，成績相當不錯。李佳芯當然開心，並說：「希望好反應可以Keep到去結局，其實初初都有啲擔心，因為我嘅角色成日發癲嗌離婚。（出街有冇畀人鬧？）冇，唔少觀眾仲話講出新手媽媽嘅心聲，頭先喺化妝間撞到車婉婉，佢話我講嘅對白全部中晒，令人好有共鳴，不過呢啲都係編劇、編審嘅功勞！」

張名雅纖瘦未見肚

劇集反應好，問有否BB廣告搵上門？她說：「仲等緊，上次同王浩信套劇都係完咗先有人搵，希望今次都一樣，可以賣吓奶粉廣告，食埋呢條水。」劇中不少演員都想拍續集，李佳芯亦舉腳贊成：「我都希望一直拍落去，拍到允豬結婚同大個，咁我又可以自己演番角色，《真情》拍咗一千集，我希望呢個劇可以拍一千輯！」

預產期12月的張名雅，未肯透露BB性別。	阮兒露纖腰，夠晒養眼。	高海寧恨與黃致豪拍續集，連劇名都諗埋。

早前公布懷孕的張名雅身形依然纖瘦，她指現已懷孕四個多月，問為何還未見肚？她說：「都有少少，食咗飯會明顯啲，我都食好多嘢o架，可能BB吸收晒啦，着泳衣會好覺。」至於BB性別，她指已知道，但希望身邊朋友估：「開盤等大家估吓，估輸咗就請食飯，依家男女都有人估。（幾時預產期？）十二月。」

未打算泳衣慶功

高海寧感謝觀眾支持，並笑指大家都很喜歡她「條線」，問是否「事業線」？她笑言：「梗係唔係啦！係我條感情線。（大家想拍續集？）都可以呀！劇情講我大肚但未生，可以拍《BB再三來了》，都有發揮。」問到若收視繼續升會否着泳衣報答觀眾？她說：「冇諗過！可以收集吓意見，睇吓觀眾想睇乜！」