無綫封殺志偉絕迹港姐
有指流着無綫血的「獎門人」曾志偉，曾希望涉足綜藝組話事，更一度與高層余詠珊鬧不和，但無綫亦放低成見，邀其亮相去年台慶。可惜志偉心中的刺難拔走，多番毫不留情狂踩港姐騷，更公然倒戈上ViuTV講波，終於辣(慶)無綫下令封殺，而無綫親生仔陳百祥亦忍唔住開腔寸爆志偉：「佢睇唔起TVB！」
其實志偉與無綫多年來的恩怨，千絲萬縷，其一言一行都衝着無綫而來，可謂又愛又恨。打從1995年開始做的《獎門人》系列遊戲節目，收視和口碑極佳，令志偉成為綜藝組的台柱，直至2013年被傳與綜藝組揸旗的余詠珊不和。不過創意十足的二人亦實事求是，以成熟態度處理局面，曾欲雙劍合璧打造一個走出錄影廠、到各區與觀眾互動的全港遊戲節目真人騷，可惜只聞樓梯響，最後亦不了了之。
權鬥失勢挖角對撼
諗頭多多的志偉，早在2016年亞視熄機時，曾傳他四出搵老闆泵水買亞視，兼向無綫幕後人員大挖角，望打造以他為首的製作團隊對撼無綫。據知無綫當時極為不滿，但最後因未成事，就當對方「一時貪玩」而當冇事發生。
2013年港姐競選，志偉又再口出狂言，寸爆由余詠珊統領的新改革賽制，由做現場（Live）變為錄影。錄影期間他更按捺不住：「X你老X！港姐係Live，點解要錄影呀？」及至去年9月，他又再寸爆狂踩，以四個字形容港姐決賽：「慘不忍睹！」
過完一輪「冷河」後，志偉終在去年《萬千星輝賀台慶》「翻生」，正當大家以為彼此關係緩和，好戲卻在後頭！志偉月前竟倒戈為ViuTV的《Good Night Show 全民睇波派對》任嘉賓，並以「明星足球隊」名義，應ViuTV安排，拉大隊往俄羅斯欣賞世界盃的終極大戰，明剃無綫眼眉！他受訪時更指無綫不會如此小器，並坦言與ViuTV會再有合作！此番挑釁行為，引爆無綫高層的怒火，在不能容忍的情況下，決定封殺志偉！
暗諷改革新不如舊
志偉昨日出席「奇華至尊月餅首播禮」，被問到可有留意今屆港姐時，對港姐又愛又恨的他「又嚟料」，先讚佳麗質素比往年好，至於會否擔任港姐司儀？他則笑說：「等佢哋搵我先，要睇吓咩模式，如果好似上年咁，淨係出嚟講幾句嘢就唔好喇。」
由於今年港姐取消外景拍攝，將到西貢拍特輯而被網民取笑由歐洲淪落到本地的西貢時，志偉「寸嘴」說：「越南個西貢？（香港西貢！）西貢咁遠呀？離將軍澳好遠喎！（覺得失色？）我自己就鍾意以前嘅模式，可以不斷更新嘅，但有啲嘢係需要保留原味。香港小姐一年一度，觀眾係期待嘅，大家都會想睇泳裝、問答環節、外面花絮，新聞界一齊出埠報道，大家討論，觀眾對港姐多啲認識，咁節目都會好睇啲。」