古天樂食大茶飯師奶亂入幫襯
影帝古天樂在新片中飾演悍匪，在鬧市搭建的珠寶店「開工」，竟然有師奶盲舂舂想衝入假舖買金，同時拍三部戲的古仔，大呻酷熱天氣下開工，日前險些中暑暈低！
古天樂昨日與姜皓文（黑仔）、顏卓靈、張繼聰等為新片《犯罪現場》拍攝打劫珠寶店的戲份，劇組花了7位數字，以兩個月時間在佐敦搭了一間珠寶店場景，古仔說：「呢場係開場戲，遲啲仲會有大廝殺重頭戲要拍，之前已租咗另一間舖拍攝爆炸場面，今次投資成本都幾貴！」據知日前大陣仗封了兩條馬路拍攝，期間有個師奶誤以為搭景是真的珠寶店，一度想入內購物。
姜皓文「犯法」嗌刺激
黑仔坦言在酷熱天氣下拍街景最辛苦，但日前拍攝他揸車逆線衝入珠寶店的驚險場口令他大感刺激：「我攞正牌犯法，拍之前都試好多次，雖然封咗行車線，但都有車，所以要試得好準。」而首次揸搶的顏卓靈，大嘆揸槍姿勢也有難度，事前要多加練習。
三片在手的古仔，前日拍另一部戲時幾乎暈倒：「當時着住皮褸，成36度熱到差啲中暑，我都暈暈哋，仲要拍飛車戲。」談到佘詩曼（阿佘）簽約他旗下經理人公司，他指阿佘貴為電視台一姐，當然有潛質。
祖兒跳舞向古仔致敬
此外，他驚喜現身容祖兒為百老滙電器拍攝的廣告網上別注版MV，祖兒化身高校教師，古仔被一班高校女生圍住高唱其《今期流行》改編版，並跳出經典舞步向他致敬，祖兒趁機跳幾下過癮之餘，還在MV結尾NG鏡頭搞笑說：「我都係聽古天樂o架！」有網民對古仔沒有施展舞技感到失望，他強調有跳：「可能剪走咗啩！都係郁吓啫。」
