陳煒為不和解畫睇慣千嬅眼色
影后楊千嬅與陳煒突傳出片場內「零交流」，二人澄清之餘更不忘互笠高帽，身為「妹妹」的朱晨麗則自爆獲「雙重照顧」，三人原來私底下時有約會，因拍劇而成為閨蜜。
因拍無綫新劇《多功能老婆》而變成閨蜜的千嬅、陳煒及朱晨麗（朱朱），彼此互相照應，然而早前三人與黃浩然、馬蹄露及黎燕珊等於天后拍外景，劇情交代千嬅有新工作，陳煒及朱朱等專誠現身打氣，有指當時陳煒與千嬅零交流，不過導演一叫埋位，二人卻「交足戲」。
互讚專業有交流
當事人陳煒及千嬅否認不和，更互笠高帽大讚對方專業。陳煒說：「嗰日要先拍千嬅、馬蹄露同童星嘅戲份，我冇理由走埋去打擾佢哋啩？咪同朱朱企埋一邊傾偈囉！大家都係好朋友，千嬅一切都準備得非常好，對白亦有自己嘅特色，我哋一個眼神已有足夠嘅交流。」千嬅亦說：「今次拍劇之餘，仲識到一班新朋友，陳煒真係位實力演員。」據悉，三人曾結伴欣賞舞台劇，關係不言而喻。
除了欣賞陳煒，千嬅亦對朱朱讚不絕口：「佢跳芭蕾舞好叻，我又鍾意睇芭蕾舞表演，佢一個女仔飄洋過海去學舞，我覺得好有鬥志。其實我哋三個乜都傾得一餐，上至健身、下至扮靚，全部都可以分享。」
讚「囝囝」醒目
年紀最小的朱朱坦言獲得「雙重照顧」﹕「好難忘啱啱開工嗰時，我啲廣東話唔正，有工作人員走埋嚟講啲衰嘢寸我，我真係唔知點解，但千嬅即刻好嚴肅咁中止對方。而陳煒知道我冇助手，有時拍嘢我行唔開買嘢食，佢買到就會分一半畀我，真係好似大姐姐咁。」
另外，千嬅談到戲中「囝囝」即母性爆發，大讚他聰明：「佢同我個仔Torres都係6歲，所以好有親切感。試過有次佢唔滿意自己表現，竟然走去同副導演講，想要一分鐘時間冷靜，返嚟佢又真係做得到喎，好叻仔！」