蕭正楠踢曹永廉入老人院
藝人蕭正楠和曹永廉前晚出席兄弟聯手的節目《兄弟大茶飯》記者會，同場有陳庭欣及余思霆等。現場有幾個黐有兩位主角「O嘴」肖像貼紙的西瓜，果汁由兩人的嘴巴倒出，營造「嘔西瓜汁」的搞笑效果。
他們透露節目中分別去了橫店、新疆、深圳和澳門等地做「外賣仔」，並自誇炮製的食物質素好，蕭正楠說：「千嬅要求好高，整啲花膠糖水應該可以滿足到佢！（佢食慣好嘢？）佢滋陰啫！」曹永廉笑指沒人肚屙。問到拍攝時可有嗌交？他直認兄弟間有心病，蕭正楠還拖：「佢暗病都有，好煩！佢係煮開飯，但我有我風格，成日加把口，喺老人院嗰日係咁話我，幾想漏低佢喺老人院！」
寸裁員「冇得留低」
提到無綫結束16廠運作及裁減配音組人員，蕭正楠大感可惜，認為共事也是緣分，期望舊同事有好發展，曹永廉則望公司重整架構後會再招攬舊員工，蕭正楠聞言笑說：「應該留嘅就留低，下一個就裁你先！」曹永廉坦言對公司有信心：「演員係簽約，裁就大鑊。（驚減人工？）唔會減人工，唔會咁對我，我一家大細，唔同佢（蕭正楠）單身寡佬。」蕭正楠聞言笑指自己都有個「口」要食。
