啤梨冧妻宣言：錢畀晒佢！
新城DJ及歌手啤梨（葉文輝）與太太Michelle昨日補擺喜酒，新娘下午以低胸黑婚紗性感現身，二人更咀足5次！啤梨大講愛的宣言冧妻，稱要請假趕造人，揚言把所有錢畀晒老婆，冧到老婆仔想喊。
「啤梨」葉文輝與Michelle去年底簽字結婚，昨日在酒店舉行結婚雞尾酒會，並在晚上筵開33席。科林及彭懷安等擔任兄弟，蕭潤邦、戴夢夢、李美琪、駱胤鳴、黃翊及陸浩明等多位圈中人到場祝賀。一對新人翹手現身，身穿黑色婚紗、谷胸上陣的Michelle表示喜歡「黑金」主題，故二人一身黑禮服打扮，而啤梨就坦言很開心：「上年差唔多呢個時候求婚，依家一周年啦，原來訂酒席要成年！」
玩新郎慶幸骨頭未硬
提到昨晨接新娘，他笑言不知道要玩新郎：「我啲兄弟『隊』我出去，好彩我啲骨頭未硬。」問到有何愛的宣言？他說：「有情深剖白，我會將所有錢畀晒佢！（講到想喊？）老婆想喊。」Michelle直言又感動又開心，啤梨續說：「我嘅人生只有太太，好多謝佢交人生畀我，我會用最大力量對佢好。」造人方面，他希望公司讓他放假去凍的地方度蜜月，笑指太太最重視冷氣。
蕭潤邦為婚禮取經
蕭潤邦（Oscar）單拖現身，將於12月與江若琳（Elanne）結婚的他自認到場觀摩，由於他已見過未婚妻穿婚紗多次，擔心到時未必感動：「佢話我一定要感動，但對男人嚟講，婚紗都係咁，最緊要唔好咁多窿！」又說當日若看見她行出來的一刻，應該都會好感動，至於到時會否喊？他說：「盡做啦，我都係因為戲屎同唱歌渣先唔做呢行啫！」
