「雄」出沒注意 生人勿近 街霸大劉擾民惡過鬼

仔女面前爆晒粗

着藍衫着到自以為係Blue Blood全身鑲鑽嘅大劉，出親街當正自己係「The One」，帶住十九幾個保鏢做「薄Lock」攔車又攔人，簡稱阻街擾民，總之條路佢行先，唔知仲以為條條街買晒、爭啲以為「紅鸞道」係「雄鑾道」呀！行厭自己個場冇地方去嘅佢，日前就踩人個場，搭扶手電梯時，見到女模許珮榆（Diva）企咗喺自己同老婆仔女之間，就斷估冇辛苦，用盡真氣鬧定Diva唔好撞親人，喺啲仔女面前爆晒粗兼公然喊打！

所謂打還打，唔好打面，等同鬧人都唔好無理取鬧，無喇喇話Diva係「整容怪物」，做咩啫？反應大到咁，唔通佢參透到人體嘅奧妙，推斷到整過容嘅人會人體大爆炸？畀人踩到上塊面，Diva話知你貴姓，唔鬧唔鬆化，一於還拖，即刻韓國國腳孫興民上身射入金球、成句「積吓福啦！」應一應車埋去，大巴大巴摑落嚟，大劉仲唔跳掣？

Diva還拖，成千上萬嘅網民拍晒手話大快人心，保護家人，人之常情，溫馨提示咪算！真係撞埋嚟，報警！唔係大聲靠惡咁討厭失禮！當然Diva都有唔啱，搭電梯玩電話真係好易有意外，但見大劉都六十有七，嘈乜鬼，敬老啦！畀人留番啖氣暖肚好過，仲要「阿叔」前「阿叔」後咁叫，加埋百幾歲當眾做鬧劇，同靈異節目《入住請敲門》搶Fo咩！

不如返火星啦！

學周星馳話齋，地球真係好危險，不如返火星！成日講到乜都有、爭在穿梭機同大炮未有嘅大劉，可以考慮吓喎！與其要班保鏢搞埋衞生做人肉毛巾架，隨時預備佢兩手一伸，不如先軍訓班保鏢做錦衣衞、毛巾變武器，自己又練番招輕功水上飄、出街坐防火又防彈嘅解款車，甚至買晒啲街申請做私人用地，咁就唔驚人揩到黐金糠！大劉猛話一眼睇得出Diva整容N次，可能佢天賦異稟有特異功能，如果係就唔好嘥料，不如回饋社會，得閒用對透視眼幫海關緝私，慳番唔少公帑，緝私犬都養少幾隻！

Nuts哥