Bruna讚男友高大靚仔默認陳偉霆身份
歌手陳偉霆（William）與巴西模特兒Bruna G Marth傳緋聞，令女方聲名大噪。榮升「霆嫂」的Bruna依舊不錫身，日前身穿性感水着現身沙灘，出盡「股惑」吸睛！直認有拖拍的她讚男友高大、靚仔兼可愛，言談間更默認William的男友身份！
現年24歲的Bruna G Marth挾「陳偉霆緋聞女友」之名上位，講到很多人認為她是靠William成名，對此她說：「人哋咁諗好平常，但我唔覺得自己出名，只係普通女仔。（有冇因為咁遇過麻煩事？）對我嚟講冇，一定有人鍾意我，有人討厭我。」她坦言跟William有保持聯絡：「我哋係朋友，點解唔聯絡？不過唔係每日，我哋會互相傳訊息。」
講到面紅紅
問到對William有何感覺，她讚不絕口：「佢好友善，係好男仔，又有靚身形。」講到傳出緋聞後，William粉絲對她發動「網絡攻擊」，Bruna坦言：「我知有好多人攻擊我，我明白佢哋，佢哋唔鍾意我，有內地粉絲話我來自巴西，同佢哋唔同，亦有人覺得我太性感，但我完全唔介意。」
至於William是否其理想男友類型？她即甜笑說：「可能啦，佢非常靚仔，可愛。（你面紅？）係呀。（你依家單身？）唔係，我有男朋友，但我唔可以透露太多，依家唔講得住，只可以講佢非常靚仔，同我差唔多高，我有1米80高。（佢係咪好靚仔同可愛？）係呀，哈哈。」
唔敢在港裸泳
炎炎夏日，Bruna被問到敢唔敢裸泳？她說：「點解唔得？我好享受夏天，但喺香港唔可以唔着衫，驚人哋睇住。」為何選擇在港發展模特兒事業？她說：「有好多原因喎。（係愛？）哈哈，好多嘢，我可以見我啲朋友，呢度係我第二個家。」還分享Keep Fit之道：「我一星期做四、五日健身同打拳，唔好食咁多甜食。」