吳卓羲帶外國老友旺角睇「4仔」

藝人吳卓羲、劉心悠、廖啟智及尹光等昨日到旺角為電影進行開鏡儀式，有過百市民圍觀，場面墟冚，惹來警察到場了解。

以為嘉穎內地結婚

於新片飾演蠱惑仔的卓羲與心悠有不少感情戲，問到對旺角有何印象？他坦言知道有一個專賣色情碟的商場，但強調自己只是去買遊戲碟：「都有落嚟買波鞋。（有冇買4仔碟？）我都係上去買Game碟咋，嗰度好嘈，其他聲我都聽唔到，不過我知嗰度4仔好聞名，外國朋友返嚟都會帶佢見識吓，呢啲地道嘢，都要畀佢知道點嗌。（有冇珍藏？）我咁忙，屋企部碟機都冇開過。」

提到好友鄭嘉穎下月結婚，卓羲坦言未收到喜帖：「如果係真會恭喜佢。（冇同你講？）佢公布我哋實收到消息。（佢有冇度你個期方便去外地飲？）真係冇同我講！內地？（係外地，你估係你咩！）我喺香港出世，點都會喺香港搞（婚禮）。」

心悠演運輸工人

穿吊帶衫上陣的劉心悠透露新片在旺角取景，不擔心人多複雜：「我好性感咩？OK嘅，但戲入面我唔會着吊帶，做運輸工人，雖然唔使粗魯，但亦唔係文靜，係少啲嘢講，粗口都唔使講，費事講歪咗會好好笑。」曾與嘉穎傳緋聞的她被問有否恭喜對方？她說：「有個『緋』字，即係唔係真啦。」

眾星在鬧市切燒豬，吸引途人圍觀。

劉心悠化身運輸工人搬「貨」。