黃建東偶像夢實做樂壇新人
藝人黃建東（Derek）憑搞笑形象上位，但原來也曾發過「偶像夢」，小時候渴望成為萬人景仰的偶像歌手，可惜長大後發現先天和後天條件不足，故決定默默耕耘，向實力派藝人進發！
參選2011年香港先生入行的Derek，至2016年憑惡搞日本洗腦歌《PPAP》才為人熟悉，自此工作量大增，一連參與多套劇集演出，剛拍畢新劇《丫鬟大聯盟》的他，被指身形隨工作量而倍增，他笑說：「我拍劇唔瞓覺會肥，因為拍劇好多時通宵，等埋位嘅時候就係咁食嘢，拍《丫鬟大聯盟》嘅時候，係成個劇組都肥咗，因為大家都會買一箱嘢食返嚟，有鹹蛋黃魚皮、薯片、朱古力同蛋糕，愈食就愈有福氣。」
恨有粉絲尖叫
講到初入行時身形瘦削，Derek指大家反而喜歡他「圓碌碌」：「啲人覺得我依家好睇啲，比較親和啲。」至於有否想過走偶像派路線？他笑言：「由細到大都係我志願，但今世嘅人生都係唔會達成，我細個好恨做偶像派歌手，試過喺Event見到一個歌手有100個人為佢尖叫，我就諗如果自己係咁幾好呢？但係諗到自己先天同後天嘅條件局限，惟有鍛煉自己嘅演藝才能，希望有日畀人話係實力派！」
密謀推出情歌
此外，他透露今年內會推出新歌和繼續拍搞笑片：「自己作緊歌，或者係二次創作。」又坦言不少客戶邀請他跟緋聞女友瑪姬合唱情歌，所以希望推出屬於自己的情歌，又不忘搞笑：「我哋情侶檔上陣，係年紀最大同最老嘅樂壇新人。」
場地：MioXpace
髮型：James Lee@HAiR
化妝：Alfred@Seven sense
服飾：L.I.M.I.T.E.；ROMAGO；Palladium HK