「仙氣紅姑」「人魚崔碧珈」熱門好啱傾

前日大多數港姐候選佳麗選擇搭港鐵離開，令月台一度聚集十多位靚女，引來不少搭客眼望望。眾參賽者先後落車，但見三位入圍大熱「仙氣紅姑」陳曉華（Hera）、「人魚崔碧珈」何泳芍（Honey）與Stephanie不僅有偈傾，三女更齊齊在佐敦站落車，結伴在街上兜來兜去，最後步進一間食肆。

以為她們捱了一整天會準備開餐，但起初只點飲品繼續傾偈，交流比賽心得，最終索女亦敵不過肚餓點了叻沙醫肚，期間依然雞啄唔斷，Honey更摸了摸Hera的頭髮，連髮質都研究一番，又齊齊自拍。三女在餐廳逗留約一小時後，最終在街口截的士離開。