張敬軒關智斌無敵同台觀眾起哄叫咀嘴
歌手張敬軒和關智斌（Kenny）的「友情」多年來都是熱話，前晚Kenny與張致恒（Steven）BOYZ「合體」為軒仔演唱會做嘉賓，Kenny更Man爆搭軒仔膊頭，台下「咀佢」之聲此起彼落，軒仔更重提成為BOYZ「開拖」的導火線傳聞！
Kenny現身軒仔紅館個唱第4場上演世紀同台，聯同Steven三人合唱《死性不改》掀起高潮，三人在台上妙語連珠，Steven問Kenny為何來做嘉賓？Kenny答：「我鍾意呀，你吹呀？」每當他一出聲，歌迷都瘋狂叫喊，軒仔亦忍不住笑問觀眾：「都唔知叫乜？知唔知咩叫無敵嘅嘉賓呀！」再次令觀眾狂叫。Kenny隨即行去搭住軒仔膊頭Man爆說：「企咪企囉，我企到咁都得呀，驚咩呀！」全場拍爛手掌。
當年成日打交
軒仔一臉得戚求證當年二人是否為他在Salon打交？Kenny即搶答：「你諗多咗啦張生！我哋成日打交o架！每次打完交經理人就會打嚟話，打還打唔好打面！話晒靠個樣搵食。」軒仔問Steven時，Steven即「入位」：「我見你哋咁耐冇見，畀你講埋先囉！」軒仔回答：「你又知我哋冇見？」觀眾即時起哄大叫：「咀佢、咀佢！」
Kenny為報「隔夜」仇
Steven繼續追問Kenny何以會來做嘉賓？Kenny說：「我嚟報仇囉。」Steven問：「報咩仇？格嘢嗰啲呀？我係話尋晚（隔夜）嗰啲仇呀？」軒仔忍不住爆笑：「頂你個肺呀！」對Steven亂爆肚，Kenny又氣又笑：「唔好再亂講嘢喎！」台上台下狂笑一輪後，三人再合唱《La La世界》作結，但觀眾仍狂呼Encore十分誇張。至於謝霆鋒和父親謝賢、黃秋生、何超蓮、鄭希怡前晚都有來捧場。
