傅嘉莉嗌得意捱轟滅聲認衰

傅嘉莉自責冇危機意識，一時失言。

傅嘉莉（Kelly）與阮小儀、金剛和衛志豪等，現正於關西的鳥取和姬路拍攝新節目。昨日大阪發生地震，關西多個地區都感受到強烈搖晃，眾人亦感受到震動。Kelly昨日受訪報平安，她表示：「一切安好，冇事，喺睡夢中被警報嘈醒，感受輕微震動，頭暈暈，兩、三秒後就停落嚟。睇到新聞報道有啲地方出現地陷、火災，不過我哋離大阪有一段距離，冇咁大震盪。屋企人都有即刻打嚟問我有冇事，我都有報平安。」

自責唔夠智慧

不過有眼利的網民發現她在IG story發放了一段短片，拍攝電視播映中的地震新聞，並留言說：「好得意，個電視畫面係喺度震緊o架！好搞笑。」隨即被網民狂轟她不尊重。Kelly事後自知失言，非常自責，立即將短片滅聲，並發文道歉：「對唔住！引嚟咁大的誤會，係我唔識表達，唔夠智慧，冇危機意識。之後再睇新聞知道有傷亡，先意識到這是一場很嚴重的天災……天祐大阪。」

小儀金剛報平安

而同行的小儀、金剛昨日亦分別報平安，小儀說：「冇事！我哋依家拍緊嘢，我哋都唔喺大阪，喺姬路，我哋今朝每個人都感覺到地震，但係就唔係咁嚴重，都知道大阪好嚴重，我哋呢邊好安全，冇事！」她指姬路地區震度屬４級。至於金剛就指：「嗰啲地震嚇唔到我哋嘅！我哋冇事，只係畀啲警報信號嘈醒！」前晚他們在當地工作後還去Shopping至深夜，搞到沒有車返酒店，在街呆等20分鐘，當時市面仍相當平靜。

事後知失言的傅嘉莉，發文道歉補鑊。	身在關西的傅嘉莉（左起）、金剛、小儀及衛志豪，昨日亮相節目《東張西望》報平安。	小儀、金剛昨日繼續行程，探訪未來相撲手。