迪子遭大叔粗口賀壽 報警仲要道歉！
擁有35E魔鬼身材的迪子過了「黑色生日」，遭大叔騷擾兼粗口問候當「賀禮」，受辱反要認錯，最終兩度報警求助，被封「厄運王」的她曾三度遇劫匪，不幸中之大幸乃劫財不劫色！
歌手迪子昨日生日，前日她跟圈中好友莊端兒及藝人張致恒的家姐張詠恩在工作中切蛋糕預祝後，晚上再跟圈外朋友到觀塘食飯，期間有陌生大叔向穿露腰裝的壽星女搭訕兼要求一齊玩，初時迪子婉拒，但其「好心」的朋友覺得對方很慘，心軟下邀對方飲酒，之後卻發覺該大叔行為怪異，迪子遂要求對方離開，結果被粗口狂罵，要先後兩次報警才平息風波。
黑仔王被打劫三次
昨日她接受訪問時說：「第一次報警係佢做埋啲滋擾行為，警察Call白車想送佢入院，但佢唔上白車。因為警察話如果我同佢道歉佢會走，為息事寧人咪道歉囉，點知警察走咗，佢又返嚟搞事，我朋友再報警，但警察未到佢又突然走咗。」
她大嘆過了難忘生日：「今年真係過咗一個難忘又唔太開心嘅生日，啲朋友仲笑我有條報警命，之前我畀人打劫過三次，命中注定成日招惹到呢啲怪人怪事。今年生日願望係希望有好事發生，出嘅新碟同新書大賣！」