唐詩詠風騷想同香香拍劇
藝人唐詩詠被指「爭角色」搞到另一無綫花旦岑麗香萌去意不與公司續約，詩詠昨日現身解畫，直指報道誇張，幸自己已煉成金剛不壞之身。至於近日捲入租務糾紛的陳展鵬，笑言要努力賺錢做業主。
唐詩詠、陳展鵬、陳自瑤、姚子羚、譚俊彥及張文慈等昨午現身馬鞍山宣傳即將推出的新劇《天命》。對於有指「搶去」香香於新劇《解決師》的角色，詩詠說：「太誇張喇，所以一定唔係呢行嘅人講囉！我哋嘅工作由一張長枱嘅人決定，我係被安排。（唔開心？）唔會，我喺是非圈工作，但唔係生活於是非圈，呢十幾年都煉成金剛不壞之身！」她表示曾經與香香出埠拍旅遊節目：「都諗過大家可唔可以合作拍劇，呢個圈子好細啫！（香香承認約滿，話之後會返香港！）係呀，留番佢講啦！」
陳展鵬發憤吸金做業主
至於捲入租務糾紛的陳展鵬表示一切交由律師處理：「總之喺合情、合理同合法嘅情況下，係有偈傾嘅。」問到會否不敢再租樓，他說：「屋企人都係業主，睇吓佢哋係咪好業主，肯租畀我囉！呢件事令我覺得要努力賺錢做業主。」他又指事件曝光後，前業主未有聯絡他：「當初如果佢覺得有問題，可以搵我，我亦冇收過佢律師信。（交番一個月租畀佢？）退租時已搞掂，依家唔係一個月租咁簡單囉！」
