王君馨遇車禍傷頸送院

王君馨

昨日父親節，不少圈中藝人在社交網洗版式留言兼甫父親合照，鬼妹仔王君馨也不例外，昨日一早就與老公Daniel動身，相約爸爸出發到銅鑼灣飯敍慶祝，沒料途中發生車禍。Grace及後於社交網圖文並茂轉述事件，透露與老公所乘的士，突然於高速公路煞停，雖然當時未有撞到前車，卻被尾隨的車輛狂撼！

食藥抖幾日

由於事出突然，Grace夫婦未能及時反應過來，結果Grace胸部、頸及背脊Chok親，Daniel亦感不適，二人由救護車送院診治。她說：「送院後一個鐘頭內，睇咗醫生寫咗報告，落咗口供，攞咗消炎藥同藥膏離開。醫生話骨同埋神經線冇事，應該係拉傷肌肉，休息幾日應該冇事，感謝神！」

王君馨坐白車送院診治後，自拍報平安。

意外中有車輛撞到車牌都甩埋。

慶幸仍活着

她更留言感謝警察、救護員及醫護的照顧，坦言被意外嚇親，慶幸仍然活着，雖然父親節飯局被迫取消，但承諾稍後會與爸爸食飯補數。Grace接受本報訪問時亦表示沒大礙：「我哋OK，依家要好好休息，多謝大家關心。」首次坐白車的她更稱趁送院短短15分鐘路程，不斷向救護員提問：「我問佢哋有冇睇《棟仁的時光》，哈哈！」

王君馨稱沒大礙，只是拉傷肌肉需休息。

王君馨原定與老公為爸爸慶祝佳節。