朱智賢急急腳趕嫁？
藝人朱智賢首次行婚紗騷，自爆事前要睇片偷師，可惜依然被指行得太快。而身形弗爆的她自言沒為此特別Keep Fit：「肥咗仲豐滿！」
朱智賢昨日為《第91屆香港結婚節暨夏日婚紗展》行婚紗騷，大騷美好身材又晒事業線，一共換上四套婚紗的她相當淡定，惹來不少龍友爭相影相，現場閃光燈不絕。朱智賢受訪時透露是首次行婚紗騷，滿意酬勞，直言演出前有少少緊張，更特意翻看藝人馮盈盈行婚紗騷的影片偷師，她笑說：「原來行婚紗騷要好優雅，佢哋都話我行得好快！」
太瘦反而顯老
未行過泳衣騷的她，被問會否想行？朱智賢表示要等經理人決定，至於尺度方面，她說：「健康就好啦，因為始終着泳衣拍嘢同行騷唔同，有好多人影！（今次做足安全措施？）安全，唔使特別黐膠紙。（Keep Fit？）冇呀，我反而肥咗仲豐滿啲，我一瘦會瘦面先，個樣睇落去老咗，又會憔悴咗，塊面凹晒！」至於與男友謝東閔拍拖大半年的她，被問到穿上婚紗可會恨嫁？她直言事業行先，等事業有成才想結婚，認為緣分要順其自然。
