陳豪中環爆肌買文具
向來是圈中「愛妻號」的陳豪，前日山長水遠由大埔去到中環，被老婆陳茵媺遙控購物。穿緊身Tee爆肌的陳豪，睇完文具又睇背囊，期間還用手機不停拍照給老婆過目，但似乎不合老婆心意，任勞任怨的他惟有行多幾間舖，搵到啱為止！
陳豪與陳茵媺（Aimee）於2013年在巴黎舉行浪漫婚禮，婚後十分恩愛，現時育有兩子一女，不經不覺大仔今年已4歲，一家五口幸福滿瀉。平日兩公婆會合力湊三個小朋友，既要拍劇又要打理咖啡店的陳豪，無論幾忙都會抽身照顧家庭，早前更被拍得為今年入讀幼稚園的細仔現身學校註冊，認真廿四孝老公！
緊身Tee晒「雞排胸」
前日下午6時許，陳豪一支公現身中環一個商場，穿上緊身Tee、白色短褲的他，胸前兩塊「雞排」相當明顯，行至冷氣大的地方，突然飛釘凸點，爆肌陳豪出現即成為焦點，引來不少途人眼望望。期間他發現記者拍照，即急急戴上黑超扮Cool，之後往附近一間大型書局。
Send相畀老婆過目
甫進店內，陳豪極速逛了一圈，睇完文具再睇背囊及電腦袋等，期間他不停用手機拍下照片，似是傳給老婆過目，又見他戴住Headphone講電話，不過似乎不合Aimee心水，之後急急腳轉身離開。問到陳豪來買甚麼？他說：「諗住買啲文具，但搵唔到，依家要去第二度再睇。」
文、攝：追蹤組