演鐵探向亡父致敬 袁偉豪清減20磅
上周丁父憂的袁偉豪昨日為劇集開工，略見清減的他雖寄情工作，但仍不時思念父親。巧合地他於劇中扮演患絕症的鐵探，拍時感觸良多，希望演好此角色，向生前任職警察的父親致敬。
無綫藝人袁偉豪的父親上星期因鼻咽癌病逝，安排好亡父身後事的他，隨即投入工作，昨日與蔡思貝、梁烈唯及楊潮凱在荔枝角為劇集《鐵探》拍攝外景。痛失至親的袁偉豪心情看來平復不少，雖然有點鬱鬱不歡，但閒時也有與拍檔傾偈，他說：「依家好啲，但靜落嚟都會掛住屋企人，只能夠講做好自己嘅工作，繼續向前行。」
戲如人生感覺玄妙
其父生前是一位警察，袁偉豪今次扮演鐵探自然百般滋味，他說：「仲頂得住，套劇嘅人物、故事同現實好似，感覺好玄妙，鐵探後期有絕症，情節同我要面對嘅差唔多，生離死別、出入殮房，返到嚟開工感覺好巧合。不過，反而因為件事，想做好啲向爸爸致敬。」
飯盒都係扒兩啖
而他之前在多套劇集也有騷肌場面，雖然電暈女粉絲，但為求突破，今次與監製蘇萬聰商量不再騷肌，而為演繹身患絕症的角色，更要速減20磅：「一邊開工一邊要減磅都幾大壓力，要有體力拍嘢，但又唔可以畀自己食得飽，飯盒都係食兩啖。」
文、攝：影視組