李日朗被騙百萬報警備案
藝人李日朗（Don）被相熟友人騙去幾年積蓄逾百萬，連家人亦慘被「拖落水」，愁爆的Don最終選擇報警求助。他預計「緝盜」過程漫長，猶幸有知慳識儉女友陪他一齊「捱窮」，可謂苦中一點甜！
日前李日朗被發現與一名資深大律師及一名律師現身中區警署，他發現記者在場等候大感愕然，起初直言想低調處理問題，後經記者連番追問才表示被友人騙去7位數字積蓄：「嚟錄口供，有個識咗十幾年嘅女性朋友攞咗我啲錢『失蹤』。據我所知，仲有其他朋友同樣損失7位數，最內疚係連累我屋企人都冇咗啲血汗錢，但我啲錢用晒嚟開戲，暫時冇能力畀番佢哋。」
女友慳儉陪捱
Don坦言有人恃住多年交情，加上彼此合作做生意，在深夜時分致電向他求救：「當時佢話急用要幫人，過幾日即刻轉番（錢）畀我，我咪畀佢囉，點知後來佢冇咗影，至今足足有半年時間，講緊損失嘅7位數，都仲未包括同佢做生意賺咗嘅錢。據知佢同老公離咗婚，依家連佢前夫都搵佢唔到。（你知道冇咗咁多錢後咩反應？）世界末日囉！幾年儲番嚟嘅錢冇晒喎，本來諗住今年環境好啲，可以同屋企人去次好少少嘅旅行，依家提都唔敢再提。（女友呢？）好彩佢唔係用好多錢嘅人，咪一齊捱囉！」
警惕身邊朋友
當日由晚上7時開始，Don逗留到翌日凌晨1時許才完成整個錄口供過程，事後他補充：「嚟緊可能要再去唔同嘅警署提供相關資料，相信事件冇咁快解決到，過程會好漫長。我亦明白未必追得番啲錢，但起碼想警方協助搵番呢個人出嚟，同埋我想佢身邊嘅人提高警覺，唔好再畀人呃！」
文：影視組