王敏德被「情信」感動匿廁所喊
王敏德、王敏奕拍劇拍出父女情，王敏奕大讚王敏德是「國民爸爸」，而現實中，王敏德亦是滿分好爸爸，曾被兩個女兒的sweet letter感動到要匿埋廁所喊！
藝人王敏德（Michael）與王敏奕（Venus）於邵氏網劇《飛虎之潛行極戰》飾演父女，兩人更因非常啱Key而拍出真感情，王敏奕盛讚王敏德：「佢係一個好Sweet嘅爸爸，冇代溝易相處，仲有佢識得彈琴同揸直升機，諗吓爸爸會喺屋企練琴三、四個鐘，真係好型，完美爸爸，做佢個女真係會好開心！」Michael聞言即笑言：「你真係要講畀我囡囡聽，佢哋投訴我，叫我唔好彈呀！」
囡囡批評 粵語好差
口說投訴，其實Michael兩個囡囡都很貼心，Michael冧滋滋說：「每逢生日佢哋都會寫啲sweet letter畀我，我一睇就忍唔住（喊），唔能夠喺老婆隔籬睇，要匿埋廁所睇，真係好Sweet！」對於仔女最喜歡聽的說話，這位風趣爸爸搞笑說：「咪係『過咗數喇』、『你夜啲返啦』！」Michael直言兩位女兒已過反叛期，反而仔仔喜愛夜蒲最令他頭痛。劇集早前在myTV Super播映，Michael指屋企人都有捧場，兩位囡囡更笑爸爸廣東話好差。
打戲受傷 男友冇氹
王敏奕在戲中飾演飛虎隊副隊長，經常要拍動作戲，有時更拍到周身傷，但男友曾國祥竟然覺得是「應該的」，王敏奕說：「我不嬲好鍾意拍動作戲，好刺激，今次拍槍戰戲亦好逼真，曾經試過同黃宗澤拍開槍戲，佢射完飛出嚟嘅彈殼喺我面龐飛過，我戴住面罩都覺得有熱力。（男友有冇擔心？）佢會話拍動作戲梗有兩、三個瘀傷，好正常。」
王敏奕
髮型：Ken Hui @ ii Alchemy
化妝：King Yip @ KINGS MAKEUP
場地：FUMI
服裝：Giorgio Armani
髮型：Hugo Poon @ Toni&Guy IFC
文：影視組
攝：司徒國榮