邱李茂琪入圍藝術界奧斯卡

歌手李克勤熱捧、珠寶設計師邱李茂琪（Margaret）設計的Ear Rods最近入圍藝術家均趨之若鶩的獎項reddot award，Margaret昨日開心表示今次她有6件作品參賽：「我收到電郵通知，有五件落選，心情好低落，點知3分鐘之後收到最後一個電郵話入咗圍，嗰時我食緊晏，開心到跳起。呢個係無線耳機上鑲白金、玫瑰金同黑金鑽石嘅設計，算係我滿意之作。」她指這個獎項等如藝術界的奧斯卡，6月便知道賽果，但揚言能入圍已經難得，她透露去年另一作品鑽石放大鏡亦曾入圍，對於其創作兩度獲認可，她不敢怠慢，會不斷構思新作。