貝安琪忍住啖氣正能量湊仔
藝人兼製片劉香萍深信「慈母多敗兒」，一直都是以嚴謹的方法教導女兒貝安琪，而安琪亦品學兼優、從不反叛，所以從來沒有令母親擔心；現時安琪已為人母，有仔萬事足的她，認為教仔最重要不可帶負面情緒。
母親節將至，名模貝安琪與媽咪劉香萍及囝囝Sebastian三代同堂預先慶祝，食完大餐之後再到公園享受家庭樂。劉香萍、安琪面對可愛的Sebastian即時冧爆，出盡法寶氹他玩，場面溫馨。與媽咪感情要好的安琪說：「因為同媽咪一齊做嘢Close啲。」
阿媽長氣好難頂
自小在德國長大的安琪，表示在媽咪身上學到很多：「學廣東話、中國文化，細個我哋又會一齊煮嘢食。（媽咪係咪嚴母？）都係，佢對我要求好高，好嚴謹。」劉香萍即說：「我個人好傳統，覺得嚴師出高徒，慈母多敗兒，嚴啲、煩啲好，記得有一次，佢終於忍唔住話我：『好似唱片機壞咗，不斷重複又重複。』我對佢都好嚴格，有次佢攞住成績表，好開心話：『媽咪我得咗啦，我攞咗B+，全班得兩個攞到。』我就話：『又唔係A或A+，你班啲同學咁渣。』跟住第日佢話：『攞B+嘅同學仔，佢媽咪請佢食大餐，你真係太嚴。』不過佢好乖，由細到大都冇要我擔心過，亦唔反叛。」
唔會亂發脾氣
現已為人母的安琪有自己的家庭，囝囝帶給她無限歡樂，她說：「做媽咪好開心，覺得生活更有意義，雖然湊小朋友好攰，但都值得。同囝囝相處最大嘅挑戰係點樣控制情緒，小朋友呢段時間好鍾意學大人做嘢，所以就算有情緒都唔可以喺佢面前發，我會深呼吸，行開吓或去飲杯茶冷靜吓，唔會發脾氣，我自己都唔鍾意人哋鬧我，鬧人唔覺得有好處，反而凡事向好方面諗，佢做啱嘅事，就會大大表揚佢。」
文：專案組
場地：HeSheEat
貝安琪服裝：Claudie Pierlot