張敬軒扮嘢成癮戴膠花畀阿媽鬧
歌手張敬軒外表斯文，但原來相當玩得，小時候更愛角色扮演，試過頭插膠花被媽媽責罵，不過他卻謙稱模仿功力「未到家」，早前貪玩扮愛瑪沃森（Emma Watson），軒仔知道對方有欣賞過他的「造型」，但換來零反應，令他無奈苦笑！
即將舉行演唱會的軒仔近日忙於四出宣傳，日前他作客TVB娛樂新聞台節目《StarTalk》，接受主播許文軒（Edmond）專訪，大談即將舉行演唱會的感受。講到今次演唱會賣點，軒仔表示﹕「最大賣點係『降兩度』會做嘉賓，其實『降兩度』係另一個自己，但唔一定翻唱女仔歌，男女歌手嘅歌曲都可以唱。」
愛瑪睇完零反應
軒仔又自爆一直愛模仿女歌手：「細個成日扮內地女歌手沈小岑，因為佢好鍾意插朵花喺個頭度，我成日攞咗屋企啲膠花去扮，搞搞震仲畀阿媽鬧。其實扮女人又邊夠王祖藍、李思捷同阮兆祥嚟吖？（你都曾經扮過愛瑪沃森。）嗰次去日本旅行，無聊玩吓啫，我知道Emma本人有睇過張相，因為有發行電影嘅朋友將張相畀咗佢經理人，但Emma睇完竟然冇畀反應呀。」
「我係傻o架！」
當提到個唱主題「Hinsideout」，軒仔感性地說：「演唱會上會呈現自己唔同嘅個性。其實我細個好鍾意角色扮演，因為內地一孩政策關係，我冇兄弟姊妹，所以要識得自己同自己玩，我好鍾意用外國卡通人物扮TVB嘅劇集人物，例如有套郭富城做嘅《風之刀》，細個我已經好犀利識得整滑輪，我會去買啲魚絲，吊住啲卡通公仔飛來飛去，所以識得我耐嘅人就知道我係傻o架！」
文：影視組