Stephy甩拖煉 「后」路 杜汶澤：佢要多謝方力申！
藝人杜汶澤找來鄧麗欣（Stephy）合作拍戲擦出火花，成功將Stephy推向本屆金像獎影后大熱。阿澤不邀功，謙稱只是她遇上「適合的時機」，更打趣說：「佢要多謝同感激嘅係方力申！」
杜汶澤憑執導電影《空手道》入圍角逐今屆香港電影金像獎「新進導演」，自認以往極度自私及態度差的阿澤，今次與團隊培養出感情，就連女主角Stephy亦大讚他於片場有魅力，阿澤說：「依家都仲有約佢哋返屋企食吓飯，嚟緊暑假再同Stephy開戲，我打算畀其中一個幕後女仔試吓執導演筒。」
負能量重啱角色
當外界覺得阿澤造就Stephy成功上位，他卻否定說：「其實只係啱Timing啫！當初我同Stephy唔熟，睇中佢係因為佢皮膚白雪雪，有主角（中日混血）嘅外形，加上佢成日好似面黑黑咁，當時佢又失戀、好重負能量，啱晒角色性格。如果話佢要多謝我，咁佢一定要多謝同感激方力申嘞！」
拋磚引玉聽秘密
阿澤又大爆Stephy減片酬夠義氣，在他眼中的Stephy，性格內斂兼愛「收埋自己」：「當時想了解佢多啲，我選擇『拋磚引玉』。我講十句自己嘅秘密畀佢聽，佢點都會回番一句自己嘢畀我啩，結果我算成功咗。」
至於小方前晚錄影節目時與唱歌老師兼契媽Christine Samson合唱，由於很久沒有在電視上獻唱，心情緊張。談及好友梁漢文日前醉駕罪成，小方有聯絡慰問對方：「之後冇再問，希望佢得到今次教訓後，更加裝備好自己。」對於杜汶澤叫Stephy多謝他，至截稿前小方未有回應。
文：影視組
化妝：Circle Cheung（ndnco.co）