古巨基被禁飲酒老婆頂上
古巨基五月紅館演唱會報喜兩度加場，獲公司特別炮製一味他至愛的菜式慶祝，本來基仔還想舉杯暢飲，但遭古太下禁酒令，最後Lorraine代夫連隊三杯啤酒跟大家「乾杯」。
闊別紅館七年，古巨基將於5月11日至14日在紅館舉行《WE我們古巨基世界巡迴演唱會》香港站特別版，早前網上預售反應熱烈，隨即加開一場，昨日主辦方再公布加開5月10日一場，合共5場，本月16日公開發售加場門票。基仔大前晚宴請TVB幕後人員，答謝他們為其音樂特輯辛勞付出，並順道慶祝第二度加場。同事特製了「大紅大紫火辣水煮魚加場麵」整蠱基仔，因「加場麵」整極唔斷，令基仔爆笑。
「炸大腸」炸爆每一場
基仔看到有他最愛的「水煮魚」、「炸大腸」等菜式，非常開心。經理人霍汶希（Mani）說：「呢三味特登點畀你食嘅！炸大腸！祝你演唱會炸爆每一場；熱辣辣長壽麵，就慶祝你場場售罄。」當他夾起水煮魚裏面的麵條，竟愈夾愈長，他笑說：「喂，點解咁長？」原來寓意他火辣的演唱會一定加場，氹得基仔非常開心。
Lorraine連乾三杯
Mani拿着啤酒跟基仔乾杯，但基仔就不停話「以茶代酒啦」，他頭岳岳望向古太Lorraine說：「問過老婆先，應該唔畀飲……」古太聞言也禁基仔飲酒，解釋翌日他要開工會水腫，古太更突然英勇地站起來說：「我幫佢頂啦！我飲！」隨即豪氣地連乾三杯啤酒落肚，愛妻心切的基仔擔心老婆飲醉，叫Mani不要再灌老婆。談到兩度加場，基仔坦言想不到同事這樣有心思為他慶祝，他說：「當然開心啦，好多謝歌迷支持，買唔到飛嘅歌迷，記得16號去撲飛，為咗答謝大家，我會盡力做好個騷。」
文：音樂組