鄭中基右腳踭骨裂坐輪椅返港
藝人鄭中基近日於泰國拍片發生意外，導致右腳腳踭骨裂，昨午坐住輪椅由兩名助手陪同下返港。他透露醫生建議休息4至8星期，但為免影響拍攝進度，預計出席金像獎後便歸位，並有意搵定替身作準備。
有份角逐今屆「金像影帝」的鄭中基（Ronald），最近夥拍周秀娜為自編自導自演的新作到泰國開工，惟上周拍攝一場動作戲，在枱上一躍而下時不慎拗傷腳，痛苦難耐的他被送到醫院檢查，結果證實右腳腳踭骨裂，需即時停工休息。
醫生建議抖兩個月
昨日，Ronald在兩名助手陪同下返港，太太余思敏也特地接機，但未幾已於人群中消失。現場所見，Ronald的右腳戴上腳箍，戴黑超兼以外套帽笠頭的他坐在輪椅上頻頻撳手機，並頭耷耷由機場職員推出接機大堂，他見到記者時一臉愕然，但亦有受訪講傷勢：「當時張枱唔係好高，自己唔小心啫！唔使做手術，醫生叫休息4至8星期，等佢自己慢慢好。（太太好擔心？）都唔係，冇乜嘢，OK嘅！」
準備替身Standby
由於未能拍攝動作戲，加上要為本周日舉行的《金像獎》作準備，Ronald表示會暫時停工養傷：「都已經喺嗰邊休息咗一星期，等過埋金像獎就返過去，到時會先拍文戲，動作戲就要睇最後個身體狀況得唔得。（搵替身？）有諗過！兩手準備。（會唔會影響拍攝進度？）咁又唔會，最多都係幾日啫！（之後動作戲使唔使改？）睇吓點，我就唔想，因為設計咗好多，希望得啦！」他指發生意外的戲份需要補拍，不擔心重返舊地會有陰影。
文：影視組