陳家樂鼻水長流林夏薇硬食
藝人林夏薇與陳家樂於無綫新劇飾演情侶，劇中不乏親熱戲份，當中一場乃家樂抱恙上陣，鼻水更滴落薇薇粉面，相當惡心，事後家樂即為此向薇薇耍冧！
林夏薇、黎耀祥、陳家樂、翟威廉等昨日出席無綫新劇《逆緣》宣傳，期間安排家樂「家法侍候」飾演其兒子及孫兒的姜大偉及黎耀祥，沒料最終反被二人拿下扮打，場面惹笑。
用副導演練掌摑
劇中與家樂有感情線的薇薇，透露今次是從演以來最多親熱戲的一次，更爆二人拍攝其中一場親熱戲時，被家樂的鼻水流到其面上：「初頭以為係口水，但見佢啲鼻水就嚟滴到我個嘴度！」家樂則解釋當時抱恙在身，及後也有向薇薇耍冧。家樂更透露劇中要掌摑黎耀祥及姜大偉，但緊張過度令手僵硬，最後要出動副導演塊面練習，才順利完成拍攝。
黎耀祥自嘲「成碌葛」
而黎耀祥就大讚家樂有潛質，開工前做足功課，故看好對方，笑指最怕與「練精學懶」的新一代合作。談到無綫早前重播經典劇《流氓大亨》，劇中他一人分飾三角，黎耀祥自嘲當時很土：「成碌葛咁，睇番都覺得肉酸，不過呢樣嘢都係幾好嘅紀念嚟嘅。」
文：影視組