倪晨曦湯洛雯娛己愚人整蠱網民
昨日是愚人節，IG女神倪晨曦（Elva）與藝人湯洛雯（Roxanne）一直被指似樣，兩人趁愚人節夾計跟網友開玩笑，在社交網互貼對方的照片來冒認是自己，由於衣着、髮型、化妝和甫士都似到足，令人傻傻分不清！Roxanne笑言要合組「撞樣檔」。
藝人最忌跟人撞樣，不過倪晨曦與湯洛雯這對好姊妹就冇有怕，還以撞樣來跟大家開玩笑，慶祝愚人節。兩人昨日在IG互貼對方相片來冒充自己，相中兩人的打扮與甫士都非常神似，她們還寫：「今天換了一個妝」及「好的相機總是拍得連自己差點也認不出自己」來誤導網友，難怪不少網友都被騙，不過也有心水清的網民一看就知道真相。
朋友都認錯！
講到今次構思，Elva說：「我同Roxanne啱啱入行做Model時就識，當年已經有人講過我哋好似樣，我哋一直想用呢件事嚟玩吓，所以趁愚人節開吓玩笑。我哋之前特登約出嚟一齊影相，夾晒化妝、髮型同衫，我哋研究過，佢嘅左邊臉，我嘅右邊臉係最似對方。」
Roxanne則指今次是兩人「首度合作」，之後會繼續一齊拍片教化妝之類，她笑言：「我哋可以組姊妹檔，或者叫撞樣檔。」Elva坦言出街都經常被市民誤認是Roxanne：「啲人會話你好靚呀，我成日睇你做戲，甚至問你係咪叫湯洛雯，我覺得幾好玩，唔會介意。」而Roxanne也有相同經歷，甚至連朋友也認錯她：「好多時有識嘅朋友會話我尋日喺銅鑼灣見到你，但我係冇去過香港島喎，或者話喺邊個活動見到你，但我係冇去，去嘅係Elva。我同Elva識咗好多年，第一眼覺得佢超級靚，所以啲人話我哋似樣，我好開心。」
Lea T.假大肚
此外，斯洛伐克女模Lea T.昨日凌晨在社交網上載撩起上衣露出腹部的照片，令人驚訝是腹部明顯隆起，看似懷孕，她留言：「將踏入人生不可思議的另一頁！」大批網民送上祝福，連好姊妹陳嘉容亦留言：「Congratulations！」事後Lea接受本報電話訪問，指昨日是愚人節，所以跟大家開玩笑，澄清絕非有喜。其後她又上載一張露出平坦腹部的最新照片。
文：影視組