陳秀雯終極性感Un「床」減壓
藝人陳秀雯（Amy）、劉雅麗（Alice）和蔡楓華等的《真．經典演唱會》將於四月舉行，他們為演出準備得如火如荼。Amy和Alice日前受訪，交流收身大法兼研究華麗性感歌衫，Amy揚言是她演唱以來最性感的造型，Alice則自嘲「消極減肥法」其實好Hea，只是食少啲嘢和做少少運動而已。相反，對養生甚有心得的Amy，則跳彈床通淋巴和減壓：「我學香薰期間都有睇到啲相關資料，跳彈床都可以增強淋巴排水，我訂番嚟放喺公司，攰就上去『Un』，15分鐘都好有效，又唔傷膝頭！」
鹹濕歌又咬又食
講到經典歌，Amy於80年代的《甜蜜如軟糖》是不少人的回憶，她說：「呢首歌唔係主題曲，今次唔會唱，但真係好多人問我，連何守信都問我會唔會唱。其實呢首歌當年有個故事，歌詞被指因意識問題被列為鹹濕歌，當中歌詞『咬你、食你』……搞到我唱時都有啲心理障礙。雖然填詞人林振強去世，但早年我哋喺街遇上，我都忍唔住問佢，佢望住我笑，然後講咗一句『你話呢！』就冇再答其他！」
呻賺少好多
演唱會首場正值哥哥張國榮逝世15周年，Alice會唱《明星》致敬，而另一首經典《儂本多情》則讓了給李龍基唱，另外她的首本名曲《我和春天有個約會》當然不少得，Alice又自爆不為人知的秘密：「其實呢首歌當年只係幾千蚊被買斷版權，自己當年係新人乜都唔識，否則，之後不停被翻唱，我可能賺唔少！」
劉雅麗髮型：DICKY LAM@iHAIR
場地：香港沙田凱悅酒店
文：影視組