江若琳反「嚇」為主扮喊離場
江若琳日前拍攝ViuTV新劇宣傳花絮，早已知道被兩位主持整蠱的她反「嚇」為主，拒絕受訪兼爆喊！當再埋位時，她見兩人驚驚時即說：「玩你哋咋！」主持之一劉翁笑言被嚇到標屎！
ViuTV全新劇集《VR驅魔人》今晚首播，有份參演的江若琳（Elanne）日前拍攝宣傳花絮，兩位主持絞盡腦汁，希望打破Elanne的開朗形象，讓觀眾見到被整蠱的她「嬲嬲豬」。劉翁透露劇集原先沒打算找Elanne做女主角，指她今次是執三攤，即時搞到Elanne面有難色。
主持被玩：嚇到標屎
劉翁見勢色不對，繼續火上加油，指原本的女主角身材火辣，有助劇集吸睛，Elanne尷尬笑說：「我覺得你哋好冇誠意囉！仲要喺鏡頭面前咁講！」劉翁雖然補鑊，但Elanne仍不為所動，還突然起身拒絕受訪，轉身離座即時爆喊，嚇得兩位主持不知所措！自知「玩大咗」的劉翁示意暫停錄影。
Elanne由工作人員陪同到洗手間，兩位主持不斷密謀對策，殊不知Elanne早已洞悉被整蠱，才決定做場戲反嚇兩人！她再次埋位時，兩位主持已變得拘謹尷尬，最後Elanne才拋出一句：「玩你哋咋！」原本面容繃緊的劉翁抹晒汗兼除眼鏡：「我嚇到標屎啊！」
文：影視組