黃愷傑脫水操肌難過打怪獸！
港星二代黃愷傑（Wesley）近年在內地走紅，入行短短6年，最近已打入荷里活參演A級特技大片《悍戰太平洋2：起義時空》（Pacific Rim Uprising）擔任要角！早前他接受本報專訪，暢談首次拍攝荷里活大片的「喜與悲」。
主演過5部電影就有機會參與荷里活大片，Wesley坦言感覺似中獎：「真係冇諗過，因為試鏡環節要經過幾輪，一開始我唔知係咩戲，只知道佢哋需要一個識英文嘅亞洲男仔，當時佢哋聯絡我喺內地嘅經理人公司，要求一個識英文嘅男仔拍片自我介紹，然後畀佢哋揀，之後電影公司就Send咗兩場戲畀我哋試，嗰時我至知道係拍《Pacific Rim》！我好興奮，因為第一集我都好鍾意！試完戲後，導演Steven S. DeKnight想以視像方式見我，但我認為面對面較好，於是即晚買機票第一時間飛去澳洲見導演，整個過程都幾神奇！」
《悍》片上集導演正是最近憑《忘形水》（Shape of Water）奪奧斯卡最佳導演的哥連慕迪多奴（Guillermo Del Toro），今集哥連慕轉任監製，可惜Wesley拍攝期間撞正哥連慕正拍攝《忘》片，所以緣慳一面。據Wesley透露，哥連慕今集都有參與行政及故事方向的工作。
特訓做倒掛Sit-up
Wesley坦言首次拍鉅製已面對極大挑戰，不過難處並非特技鏡頭，而是為角色「操肌」：「同我想像中有差別，我最初以為有好多綠幕特技鏡頭，但去到現場又發覺唔同，劇組人員建咗好多『實景』，只不過我哋喺機械人裏面嘅駕駛艙就有好多綠幕鏡頭，要憑空想像同其他怪獸對打。」他續說：「我哋有接受訓練，有個真實嘅軍官教我哋點樣敬禮同軍人基本禮儀，但最主要係我哋體能上嘅鍛煉，因為我哋飾演新一代『機甲獵人』駕駛員。籌備時期，電影公司都有安排健身教練同營養師嚟訓練我哋。故事有一場要我半裸現身，令我更加有壓力，要Push自己睇吓可以去得幾盡。我特別問健身教練點樣先可以令肌肉望落更有線條同好睇啲，佢提議我脫水，可以令皮膚同肌肉貼實，但就需要一星期時間，於是我開始進行脫水步驟，油同鹽絕對唔掂得！脫水期間好辛苦，因為低血糖，所以會令到整個人好疲倦同脾氣暴躁，結果體重急跌5公斤！最難忘就係我半裸嗰場，戲入面我要做倒掛Sit-up，要用幾日時間訓練呢個動作，好困難！」
乘勝追擊演科幻片
《悍》片今集加入多位華人演員如張晉及景甜，亦有日本演員如真劍佑及菊地凜子參演。對於首次與巨星合作，Wesley坦言很興奮：「我係睇佢哋嘅戲大，現場見到佢哋好似Fans見偶像一樣，能夠同佢哋同場演戲，當然好開心！張晉喺拍攝現場都有同我傾偈，佢有為我打氣，叫我畀心機！」雖然未知會否在第3集亮相，但Wesley透露已有荷里活片商再邀他拍戲：「係一部科幻片，目前好初步，我係主角之一，預計年底進行籌備工作，明年初就會開鏡。」近日他已投入宣傳工作，前晚偕張晉等在港出席首映造勢。
文：外娛組